Kooxda Liverpool ayaa isha ku heysa inay lasoo saxiixato 18-sano jir mucjiso ah si uu u noqdo badalka mustaqbalka fog ee Virgil van Dijk laakiin waxay tartan kala kulmeysaa Arsenal:
Arne Slot kooxdiisa Liverpool ayaa isha ku heysa inay lasoo saxiixato daafaca Palmeiras Vitor Reis si uu u noqdo bedelka mustaqbalka fog ee kabtanka Holland Virgil van Dijk, sida laga soo xigtay wargayska kasoo baxa Brazil.
Reds ayaa tartan kala kulmi doonta kooxda Mikel Arteta ee Arsenal oo ku aadan saxiixa da’yarka reer Brazil.
Sida ku cad warbixinta aan kor ku soo sheegnay, Vitor Reis wuxuu ku jiraa raadaarka suuqa kala iibsiga waxaana ku daggaalamaya saxiixiisa dhowr koox oo Yurub ah. Si kastaba ha ahaatee, kooxuhu weli masoo gudbinin dalab rasmi ah oo ay ku doonayaan daafaca 18 jirka ah.
Qandaraaska haatan ee kabtanka Liverpool Virgil van Dijk ee Anfield ayaa wuxuu dhacayaa xagaaga soo socda. Sidaas darteed, Reds ayaa haatan raadineysa bedelka mustaqbalka fog ee xiddiga reer Holland.
Dhanka kale, Gunners ayaa sidoo kale xiiseyneysa inay 18 sanno jirkaan keento waqooyiga London si ay ugu kordhiso dhana daafaca dhexe ee kooxda.
Vitor Reis ayaa qandaraas kula jira kooxda reer Brazil ee Palmeiras ilaa xagaaga 2028. Qandaraaska waxaa sidoo kale ku jira qiimaha lagu burburin karo oo ah 100 milyan oo euro.
