30 sano kadib, Muqdisho oo caawo lagu qabtay ciyaar lagusoo gabagabeeyay tartanka kubada cagta gobolka Banaadir.

Degmada Waaberi ayaa caawa ku guuleystay Tartanka Kubadda cagta ee degmooyinka, kaddib markii ciyaartii Finalka ay uga badisay degmada Hodan 3-1.

Ciyaartoyda degmada Waaberi ayaa qeybtii hore ee ciyaarta la soo baxay dar dar, waxaana ay labaatankii daqiiqo ee u horeysay ay dhaliyeen labo gool oo deg deg ahaa.

Degmada Hodan ayaa qeybtii hore heshay rigoore, inkastoo ay khasaariyeen, hase ahaatee calan-wadaha ayaa ku tilmaamay in goolhayaha degmada Waaberi uu qalad sameeyay, banaanka u soo baxay, waxaana mar kale loogu celiyay Rigoorada inay tuurtaan degmada Hodan, waana ay iska khasaariyeen markii labaad ee loogu celiyay.

Waaberi ayaa qeybtii hore ee ciyaarta ku hoggaamineysay 2-gool iyo waxba, waxaana laga saaray hal ciyaaryahan, oo la siiyay kaarka cas.

Qeybtii labaad ayaa Waaberi ay la timid goolkii saddexaad, waxaana uu ahaa gool niyad jabiyay ciyaartoyda iyo taageerayaasha Hodan.

Ciyaartoyda degmada Hodan oo xaalka ku xumaaday, waxaana dhowr jeer ay isku dayeen inay goolasha lagu leeyahay iska soo gudeen, balse 15-daqiiqo markii ay ciyaarta ka harsaneyd ayaa waxaa ay heleen hal gool.

Ugu dambeyn ciyaarta ayaa ku soo idlaaday 3-1 oo ay guusha ku racaday, koobkiina ay ku qaadeen kooxda degmada Waaberi, oo markii 3aad Final u soo baxday, iyadoo labadii Final ee u dambeeyay koobka laga qaaday.

Ciyaartan ayaa aheyd tii u horeysay ee la qabto xilli habeen ah muddo 30 sano, waxaana garoonka Koonis Stadium lagu dhajiyay nalal waa weyn oo garoonka oo dhan ifinayay.

Ciyaarside ku xidhnow mar kasta.

Fikradaha Akhristayaasha (0)


Comments are closed.